ភ្នំពេញ៖ គណបក្សប្រជាជនរាជធានីភ្នំពេញបានសម្រេចបង្កើតសាខាចល័តគណបក្សដើម្បីកៀគរអ្នកគាំទ្របន្ថែម និងបានតែងតាំងអតីតមន្ត្រីគណបក្សប្រឆាំងជាប្រធានសាខាចល័តនេះ។
អតីតសមាជិកគណបក្សភ្លើងទៀន លោក ឆេង គឹមសេង ត្រូវបានតែងតាំងជាប្រធានសាខាគណបក្សប្រជាជនកម្ពុជាចល័តតាមមូលដ្ឋាន ភ.ព.ព.ស ជាមួយនឹងអតីតមនុស្សមកពីគណបក្សប្រឆាំងមួយចំនួនទៀតជាអនុប្រធាន និងសមាជិក។
យោងតាមការប្រកាសសេចក្ដីសម្រេចនៅស្នាក់ការកណ្ដាលគណបក្សប្រជាជនរាជធានីភ្នំពេញ ព្រឹកថ្ងៃទី៩ ខែមេសា ឆ្នាំ២០២៣នេះ សាខាចល័តមូលដ្ឋានគណបក្សរាជធានីភ្នំពេញគឺចំណុះឱ្យគណៈកម្មាធិការគណបក្សរាជធានីភ្នំពេញ។
ជំនួយការសម្ដេចតេជោ ហ៊ុន សែន គឺលោក ដួង ដារ៉ា បានស្វាគមន៍ការបង្កើតសាខាគណបក្សប្រជាជនកម្ពុជាចល័តតាមមូលដ្ឋាន ភ.ព.ព.ស នេះ ដោយថាសាខានេះនឹងជួយចុះពន្យល់តាមមូលដ្ឋានក្នុងរាជធានីភ្នំពេញទាំងមូលបញ្ជៀបព័ត៌មានដល់សមាជិកប្រឆាំងឱ្យវិលត្រលប់មករួមរស់ និងគាំទ្រគណបក្សប្រជាជនវិញ។
គួរឱ្យដឹងថានៅថ្ងៃនេះសាខាចល័តគណបក្សប្រជាជនកម្ពុជាចល័តតាមមូលដ្ឋាន ភ.ព.ព.ស បានប្រមូលសមាជិកគាំទ្រពីបក្សប្រឆាំងឱ្យមកចូលជាសមាជិកគណបក្សប្រជាជនបានជាង ១ ៤០០នាក់ហើយ៕